Joh 3 | PltULB | STEP | Ary nisy Fariseo iray antsoina hoe Nikodemosy, mpitarika Jiosy.

John 3

1 Ary nisy Fariseo iray antsoina hoe Nikodemosy, mpitarika Jiosy. 2 Nanatona an’i Jesosy tamin’ny andro alina io lehilay io ary niteny taminy hoe: ‘’Raby, fantatray fa mpampianatra izay avy amin’Andriamanitra Ianao, satria tsy misy mahavita ireo famantarana ataonao raha tsy miaraka aminy Andriamanitra.‘’

3 Dia namaly azy Jesosy nanao hoe: “Lazaiko aminareo marina, dia marina tokoa, fa raha tsy ateraka indray ny olona, dia tsy hahita ny fanjakan’ Andriamanitra izy.” 4 Nikodemosy niteny taminy hoe: “Amin’ny fomba ahoana no hahateraka ny olona iray raha efa antitra izy? Tsy afaka hiditra fanindroany ao an-kibon-dreniny izy ary hateraka, sa ve afaka?‘’

5 Namaly Jesosy hoe: ‘’Lazaiko aminao marina, dia marina tokoa, fa raha tsy nateraka tamin’ny rano sy ny fanahy ny zanak’olona, dia tsy afaka hiditra ao amin’ny fanjakan’Andriamanitra izy. 6 Izay ateraky ny nofo dia nofo, ary izay ateraky ny Fanahy dia fanahy.

7 Aza gaga amin’izay nolazaiko anao hoe: ‘Tsy maintsy hateraka indray ianareo.’ 8 Ny rivotra mitsoka na aiza na aiza iriany; renao ny feony, fa tsy fantatrao izay niaviany na izay alehany. Tahaka izany avokoa izay ateraky ny Fanahy.”

9 Namaly Nikodemosy ka niteny taminy hoe: “Ahoana ny fomba hahatanterahan’izany zavatra izany?” 10 Jesosy namaly ka niteny taminy hoe: “Mpampianatra an’Israely ve ianao, dia mbola tsy azonao ihany izany zavatra izany? 11 Lazaiko aminao, marina, dia marina tokoa, fa izay fantatray no resahanay, ary izahay manambara ny momba izay hitanay. Kanefa mbola tsy manaiky ny fanambaranay ianareo.

12 Raha nanambara taminareo ny zavatra tety an-tany Aho nefa tsy hinoanareo, amin’ny fomba ahoana no hinoanareo Ahy raha hitantara aminareo ny zava-misy any an-danitra Aho? 13 Tsy nisy niakatra any an-danitra afa-tsy Ilay nidina avy tany, dia Ilay zanak’Olona izany.

14 Ary toy ny nanandratan’i Mosesy ny bibilava tany an’efitra, no tsy maintsy hanandratana ny Zanak’olona, 15 mba hanana fiainana mandrakizay izay rehetra mino Azy.

16 Fa tena tian’Andriamanitra izao tontolo izao, ka nomeny ny zanany lahy tokana, mba tsy ho very izay rehetra mino Azy fa hanana ny fiainana mandrakizay. 17 Fa Andriamanitra tsy naniraka ilay Zanaka lahy ho amin’izao tontolo izao mba hanameloka izao tontolo izao, fa mba hamonjy izao tontolo izao amin’ny alalany. 18 Izay mino Azy dia tsy helohina, fa izay tsy mino kosa dia efa voaheloka sahady satria tsy nino ny anaran’ilay Zanaka lahy iray sy tokan’Andiamanitra.

19 Izao no anton’ny fitsaràna: tonga teto amin’izao tontolo izao ny fahazavana, nefa dia naleon’ny olombelona ny haizina toy izay ny mazava satria ratsy ireo asa nataony. 20 Fa izay rehetra manao ratsy dia mankahala ny mazava ary tsy manatona izany mba tsy ho hita miharihary ireo asany. 21 Kanefa, izay manao ny marina dia manatona ny mazava mba ho hita tsara fa ireo asany dia natao arakan’Andriamanitra.”

22 Taorian’izay, dia nandeha tany Jodia Jesosy sy ireo ny mpianany. Nitoetra fotoana vitsy tao niaraka tamin’izy ireo Izy ary nanao batisa. 23 Ary Jaona koa nanao batisa tany Ainona akaikin’i Saleima satria betsaka ny rano tany. Nanatona azy ny vahoaka ary natao batisa, 24 fa tsy mbola nalefa any an-trano maizina Jaona.

25 Avy eo nisy fifandirana tamin’ny sasany amin’ireo mpianatr’i Jaona sy Jiosy iray momban’ny andro fisasana. 26 Nanatona an’i Jaona izy ireo ka niteny taminy hoe: ‘’Raby, Ilay iray niaraka taminao tany ampitan’ny reniranon’i Joridana, izay nambaranao, indro, manao batisa izy, ary manatona azy avokoa izy rehetra.”

27 Ary Jaona namaly hoe: ‘’Tsy afaka mandray na inona na inona ny olona iray raha tsy nomena azy avy any an-danitra izany. 28 Ianareo ihany dia efa afaka ny vavolombelona amin’ny lazaiko hoe: ‘Tsy ilay Kristy aho,’ fa kosa: ‘Nirahina talohany.’

29 Ny ampakarina dia an’ny mpampakatra. Ary ny sakaizan’ny mpampakatra, izay mitsangana sy mihaino azy, dia mifaly indrindra nohon’ny amin’ny fahenoana ny feon’ny mpampakatra. Izany, ary, no mameno ny hafaliako. 30 Tsy maintsy mitombo Izy, fa izaho kosa tsy maintsy mihena.

31 Izy izay avy any ambony dia ambonin’ny zava-drehetra. Izy izay avy eto an-tany dia avy eto an-tany ary miresaka momban’ny eto an-tany. Izay avy any an-danitra dia ambonin’ny zava-drehetra. 32 Izy dia manambara ny momba izay hitany sy reny, kanefa dia tsy misy mandray ny fanambarany. 33 Izay nandray ny fanambarany kosa dia nanamafy fa marina Andriamanitra.

34 Fa ilay iray nirahin’Andriamanitra dia milaza ny tenin’Andriamanitra. Satria tsy nasiany fetra ny fanomezana ny Fanahy. 35 Ny Ray tia ilay zanaka lahy ary nametraka ny zava-drehetra teo ampelan-tanany. Izay mino ilay Zanaka lahy dia manana ny fiainana mandrakizay, fa izay tsy mankàto ilay zanaka lahy kosa dia tsy hahita fiainana, fa hitoeran’ny hatezeran’Andriamanitra.”